Х.Бөхманд: Эвлүүлж бүтээсэн шүлэг

Нулимсний тухай шүлэг бичлээ .
Сайн шүлэг болоогүй ээ…
Дараа нь
Дан нулимс зурчхаад
Хамтад нь өлгөлөө .
Бас болоогүй ээ …
Ахиад бодож бодож
Инээж байгаа түүгээрээ
Бариулчхаад харлаа .
Одоо болсон оо …

2015.11.06
Токио

***

Япон тэнгисийн хөвөөнд
Надад гологддог нэг шувуу бий ,
Донгодохыг нь амжуулаад
Ээж аав уруугаа утсаар яръя даа,
Хөөрхөн шувуу болог оо …

2015.11
Токио

***

Чи эндээс явж болно өө ,
Чимээгүйхэн шөнөө аваад …
Чи энд ахиад ирж болно өө ,
Дув дуугүй өдрөө авчраад …
Хариуд нь өдөр шөнө шиг үг хэлье :
Мөрөөрөө яв !
Байгаагаараа бай !

2015.11.05
Токио

***

Намайг сэрэхэд
Цонхон дээр
Нэг шувуу сууж байжээ .
Нөгөөдөх нь ирэхэд
Хоёулаа болоод нисжээ .
Санахад
Саяхан ирсэн нь
Эр шувуу байлгүй …

2015.11.03
Токио

***

Миний эзгүйд
Чи минь
Нүдээ таг аниад
Адраа хараад хэвтэж үз
Бас хаалгаа түгжээгүй гэж бод
Хэн нэгний гар
Төмөр шиг сонстож магадгүй юм
Тэгээд төмөр хир хөнгөн гэдгийг ухаарахгүй үү

Намайг ирэхэд
Чи минь
Гараа гэнэт тулаад
Ороо хараад босож үз
Бас түлхүүрийг чинь алдсан гэж бод
Хэзээний танил гар
Мод шиг сонстож магадгүй юм
Тэгээд мод хир хүнд гэдгийг мэдрэхгүй үү

Зэв идсэн нэгний
Чийг үмхсэн нэгний
Жил сар өдрийг нөгчөөхгүй үү …

2015.11.03
Токио

***

Бороо ордоггүй ээ …
Хар нүдэн охин та
Харамч нулимстай байжээ .
Салхи сэвэлздэггүй ээ …
Хацар гоо бүсгүй та
Харс хавартай байжээ .

2015.11.03
Токио

***

Чи минь
Далайн тан дээр
Тэнгэр харж
Хөлөө солбин
Хөлийнхээ эрхий хурууг
Хөдөлгөж хэвтэх юм .
Атгасан загасныхаа
Амыг нь ангайлгаад ч яах бэ гэж
Чинийхээ гөлийг үмхүүлж тоглолоо .
Хачин жигтэй гэдэг нь ,
Харын хар загасны
Цагаан , хайч сүүл нь
Та хоёр үү гэх шиг гулбалзах юм …

2015.11.09
Токио

***

Гэрлийг чинь унд
Дүрсийг чинь дэр болгоод хоночихмоор зав
Надад байдаггүй хирнээ
Юундаа сэрвийгээд байдаг юм бэ,
Сараа гуай !
Би ганц нэг шөнийг ч
Танд байтугай
Өөртөө ч зориулж чадахгүй байна аа …

2015.11.10
Токио