Х.Бөхманд: Чөдөр өвс / цуврал дөрөв/ 

Хар гол

Шувуугаа шимсэн
Хар гол
Тэнгэрээ ч хатаажээ.
***
Харц эсгэсэн онгоц
Хар голын дээгүүр өнгөрнө.
Хар шувуу сүүдрийг нь урна.
***
Хар голын ус
Хашлага дамжин урсана...
Хагас бичсэн шүлэг энэ аж.
***
Малын цуваа хэрчсэн
Засмал зам
Билүү шиг...
***
Ургасан цэцгээс илүү
Ургасангүй цэцгийг тод санадаг
Ургах гуниг минь...

Яруу найргийг хэн бичиж чаддаг юм бэ

Бурхан
Эсвэл
чөтгөр 
***
Тэнгэр дүүрэн шувууд
Тэр чигээрээ цэцэг
Гундах зун...

Хоёр мод

Хорвойсон мөчрөөрөө
Зун дуудна,
Хугарсан салаа нь Бураалчихжээ.
***
Чамд гологдсон
Пальто-г харсаар
Чиний зун болчихлоо би
***
Миний бичсэн шүлгийн цаасаар
Аав тамхи ороож татлаа
Уухилж байгаа шүлэг тэр ээ...
***
Урт намар
Чиний юүпүгээс
Богино...
***
-Л.П-д зориулав

Хонь чоно шиг болохоор
Хургыг дөхүүлэхэд
Яадаг бол?
***
Модон дээр 
Тоншуул уйлна
Нулимс нь өд билүү?
***
Авгайтай чинь уулзаад
бээлий зүүхээ мартав.
Хөлөөр энэ үдэш өгсөнө...
***
Гандсан дарцаг шиг үүлсийг
Нүдээрээ хүвэрдэх ээж минь-
Дөрвөн цаг...

Галуун зэл - суугдал

"...
   ?
..."

Нугасчины үлгэр

Нугас шарсаар
Нугас болсноо
Мэдсэнгүй...
***
Ус цол хийх нь
Яг би зүүдлээд
Сэрэх мэт...

Хүн хэрэв мод байвал...

Үхэл нь - үндэс
Амь нь - мөчир
Заяа нь - иш

Бүрд

Дэргэд нь
Ингээ саахад
Ус нь сүү
***
Салхи хэнтэй уулзах гэж
Ингэтлээ
Жихүүн исгэрээ бол?
***
Өрөөлийн авгайтай
Өвсөн дунд...
Үрийнхээ ирж явааг мэдсэнгүй
-Л.П-д зориулав

Хэрэгт хүрнэ гэдэг энэ

Модондоо хоргодсон алимий
Хэрээ аваад явахад
Би баярладаг...

Өвс

Салхинд ирлүүлж
Бөхөлзөх тусам
Салхи нь илүү бөхөлздөг.
2014.01.12
Tokyo
***
Үхсэн амьдын ялгаагүй
Тавганд загас
Амаа ангайж байдаг.
2015.05.23
Tokyo
Ханьтай болсон гэдэг гурван сар

Түрийвчээ
Цөнхөндээ биш
Дагуулж явсан юм аа чи минь...
2015.03.05
Tokyo
***
Чиний сэтгэлгүй бие
Над
мэлхий сүүдэр урахыг санагдуулана...
2015.03.06
Tokyo
Чинийхээ нүдэнд
Өөрийгээ харлаа.
Атийгаад байгаа юм шиг...
2015.03.06
Tokyo
***
Дээвэр нэвт бороо орсон
Дэрээ дэвттэл чи минь уйлсан
Хайртай хүндээ хүн тэнэг ханддаг аа...

Цусаа хуваахад үхсэнийг чинь яамай даа

Хар дуутай
Шар ялаа
Улаан гэдэстэй
***
Нөмрийн навч шиг
Цэцэрх тусмаа
Өвөлд би хайртай...
***
Сайн ирэв үү хүү минь гэх шиг
Салхи исгэрэх нь
Бурхны алтан мутар...
***
Бороо ганц хоёр туслах нь
Шувууны баас унах мэт
Лайтай...

-Яруу найрагч Р.Цэцэнцогт ахдаа зориулав

Алтанхуа цэцгэн дунд
Ах минь сууна.
Ард нь уул ор шиг харагдана...
***
Тансаг найрнаас
Харьж амрахад
Тайчисан өмд завилсан хэвээрээ...

Мэнгэ

Сэтгэлийн минь алдааг тэмдэглэх гэсэн шиг
Биед минь 
Хэчнээн мэнгэ гардаг юм даа...
2015.03.05
Tokyo
***
Хасын чимхэлсэн банш
Хайрынх нь
Уруул шиг харагдана...
2015.03.29
Tokyo
***
Сэтгэлээ дүүргэх гэж
Үлдээсэн хогыг чинь
Хадгалмаар...
***
Бороогоор
Өвс цэцэг хоёр ургах нь ээ...
Эрвээхий хоргодсон нэгэндээ атаархах нь ээ...
2015.06.10
Окинава
***
Үсээ би будсан юм.
Үг ярьдаг болохоор нь
Уруултайгаа ижилхэн болгох гэж...
2015.06.10
Okinawa
***
Тараанд орсон өт
Намайг хүртэл
Хялайна...
2015.07.02
***
Нисэхээс
Нисэхийг
Бодох нь нисэх...
2015.07.02
Хоёр шаазан шувуу

Хайрын гэрч -
Хоёр шаазан шувуу
Толгой толгойгоо иджээ.
2015.07.03
***
Буянтай хүний тарааг
Шувуу цөмөөд
Үрлүүлэнэ...
2015.07.03

/ Түмт шинэ хөрвүүлэв/