өөлүн үжиний бэлэгт зүүд

үзэсгэлэн сайхан өөлүн хатан
өргөө цагаан гэртээ нойрсож
өлзий бэлэгт нэгэн зүүдээр өрлөг
тэмүүжинг жирэмслэв

амгалан цагаан гэрийн тооноор
алтан од харван ирээд
асах голомтын тоногт тосож
арван ханатад гэрэл сацрав 

цагаан морь унасан
цацагт мөнгөн дуулгатай
саран тунгалаг царайтай
сайхан мушгиа сахалтай

одон тунгалаг нүдтэй
урт ишт жадтай
Есөн тохой биетэй
ертөнцөд хосгүй хүн

өөлүн эхийн өмнө
өвдөг нугалан сөхөрч
үр хүүхэд нь болж
өргөж сугадан асрав

энэ сонин зүүднээс
эх өөлүн цочин сэрж
эргэн тойрнийг харвал
эрдэнийн гэрэл сацрана

тэр гайхамшиг зүүдээр
тэмүүжин хөвгүүн ирж
дэлгэр монгол туургатанд
тэнгэрийн сүлд буужээ